ملي ټلویزیون پر خپله ټویټر پاڼه خبر ورکړی چې د طالبانو د دفاع وزیر مولوي محمد یعقوب د کرېکټ بورډ له رییس میرویس اشرف او د کرېکټ بورډ د اجرايي چارو له رییس سره کتلي دي.
په دغه لنډ خبر کې راغلي چې مولوي یعقوب له کرېکټ بورډ سره د هر ډول همکارۍ ژمنه کړې ده.

ريښتیا ارزول:
مولوي یعقوب سه شنبې د غبرګولي میاشتې په ۲۳مه د ټلویزیوني خپرونې د ثبتولو لپاره د طلوع نیوز دفتر ته تللی و او په تصادفي توګه یې د طلوع نیوز په دفتر کې د کرېکټ بورډ مسوولین لیدلي دي.
د طلوع نیوز د خپرونو برابروونکی وايي، د کرېکټ بورډ رییس د یوې جلا خپرونې د ثبت لپاره طلوع نیوز ته راغلی و او د مولوي محمد یعقوب او کرېکټ بورډ د مسوولینو ترمنځ د کتنې او خبرو هېڅ پروګرام له وړاندې نه و برابر شوی؛ خو ملي ټلویزیون له همدې عکس څخه یو خبر جوړ کړی او داسې یې ښودلې چې دا یوه رسمي لیدنه وه.
په دولتي او ګوندي رسنیو کې ډېری خبرونه تبلیغاتي اړخ لري او پېښې په هغه ډول نه دي چې په خبرونو کې راځي.