تېره اونۍ، د طالبانو د بهرنیو چارو سرپرست وزیر امیر خان متقي ملی ټلویزیون ته وویل چې “داعش په افغانستان کې نشته”، خو دا ادعا د طالبانو د ویاندانو له خوا د خپرو شویو احصایو او همدارنګه د سیمه ییزو هېوادونو او د ملګرو ملتونو د امنیت شورا د راپورونو سره په ټکر کې دي.

په یوه کال کې د داعش پر ضد ۸۰ عملیات

د طالبانو ارقام ښیی چې تېر کال د خراسان څانګې د داعش د غړو پر ضد شاوخوا ۸۰ عملیات د طالبانو له خوا ترسره شوي، چې ډېری یې په کابل، بلخ او هرات ولایتونو کې ترسره شوی دی.
د طالبانو د کورنیو چارو د وزارت د ارقامو له مخې، په دغو عملیاتو کې د داعش له ۱۰۰ څخه زیات غړي وژل شوي او له ۱۰۰ څخه ډېر نور نیول شوي دي.
په دغو عملیاتو کې د داعش دوه مشران اعجاز امین اهنګر او قاری فتح هم ووژل شول.
افغانستان د مرکزی او جنوبی اسیا لپاره ګواښ دی
د ملګرو ملتونو د امنیت شورا د ۱۴۰۱ کال د کب په میاشت کې خپور شوی راپور وایی، افغانستان په تروریستی ډلو کې د خپلو فعالیتونو له امله مرکزی او جنوبی اسیا ته ګواښ دی.

د راپور له مخې، د طالبانو له خوا د یوې اغیزمنې امنیتی ستراتیژۍ په نشتوالی کې، ترهګرې ډلې لکه داعش، خراسان څانګې، القاعده، تحریک طالبان پاکستان (ټی ټی پی)، د ازبکستان تحریک اسلامی او نورې ترهګرې ډلې په هیواد کې له ازادۍ او فعالیت څخه برخمنې دی.

د ملګرو ملتونو د امنیت شورا راپور وایی، داعش، چې په افغانستان او د خراسان تاریخی سیمې باندې ستراتیژیک تمرکز لری، غواړی چې د خپلو بریدونو له لارې وښیی چې طالبان ناتوانه دی.

د ملګرو ملتونو د امنیت شورا په وینا، داعش هڅه کوی چې په سیاسی ماموریتونو باندې د بریدونو له لارې د طالبانو او نورو هیوادونو ترمنځ سیاسی اړیکې کمې کړی.

په راپور کې ویل شوی چې د سپتمبر په میاشت کې د روسیې پر سفارت برید، وروسته له هغه د پاکستان سفارت او هغه هوټل چې چینایی اتباعو پکې شتون درلود، دغه ډله په افغانستان کې ډیره مطرحه کړې، د دې ترڅنګ داعش په مکرر ډول په شیعه ګانو باندې بریدونه پلان کړي او ترسره کړي ترڅو د پښتنو واک کمزوری کړی.

په بلخ کې د طالبانو پر والی برید او د تېرې شنبې په ورځ په کابل کې د داعش پر ضد عملیات هغه وروستۍ تازه پیښې دي چې له یادې ډلې سره تړاو لري.

د ملګرو ملتونو د امنیت شورا د راپور له مخې په افغانستان کې د داعش شمېر له ۱۰۰۰ څخه تر ۳۰۰۰ پورې اټکل شوی، خو ځینې اټکل کوی چې دا شمېر به تر ۶۰۰۰ پورې وی.

د ملګرو ملتونو د امنیت شورا په راپور کې ویل شوی، د داعش مرکز په کونړ، ننګرهار او نورستان ولایتونو کې دی، او یو لوی مرکز یې په کابل او د ښار په شاوخوا کې فعال دی، خو کوچنۍ ډلې یې په بدخشان، فاریاب، جوزجان، کندز، تخار او بلخ ولایتونو کې پیژندل شوی دی.

د مخدره توکو قاچاق د دې ډلې د عاید یوه سرچینه ده.

د احصایو له مخې، په 1401 کې، کابل، بلخ، بدخشان او کندز ولایتونه د وژونکو بریدونو هدف وو.

په دغو بریدونو کې تر ۱۰۰ ډېر کسان ووژل شول او تر ۲۷۰ ډېر نور ټپیان شول.

تر ټولو وژونکی بریدونه په دشت برچی کې د عبدالرحیم په ښوونځی، خانګاه علاء الدین، وزیر اکبر خان جومات، د هرات د ګذرګاه جمی جومات، د کاج روزنیز مرکز، د سمنګانو جهادی ښوونځی او د بهرنیو چارو وزارت باندې بریدونه وو.

په افغانستان کې د داعش پیاوړتیا

پداسې حال کې چې د طالبانو د بهرنیو چارو سرپرست وزیر ادعا کوی چې داعش په افغانستان کې شتون نلری، هغه د حکومت د سرپرست ویاندانو لخوا ترلاسه شوی ارقام هم ردوی.

په دې وروستیو کې، د متحده ایالاتو د لوی درستیز جنرال مایکل کوریلا وویل چې د داعش وړتیاوې په تیر کال کې زیاتې شوې دی: “زما د قوماندې اټکل دا دی چې د داعش خراسان څانګه کولی شی له شپږو میاشتو څخه په لږ وخت کې د متحده ایالاتو یا نورو لویدیځو هیوادونو د ګټو پروړاندې عملیات ترسره کړی.”

سرچینې:

امیر خان متقی له ملی تلویزیون سره مرکه مارچ ۱۹

د ملګرو ملتونو د امنیت شورا راپور ۱۳ فبروری

جنرال مایکل کوریلا ، سینټ کام. 16 مارچ

د طالبانو ویاند ذبیح الله مجاهد