تېره اوونۍ ایران ته د هلمند سیند اوبه روانې شوې او یوه ایراني دیپلومات د دغه هېواد رسنیو ته ویلي چې له «طالبانو سره له تعامل» وروسته د هلمند له سیند څخه ددغه هېواد د حق‌آبې بهیر پيل شو.
ایران ته د هلمند سیند اوبو له بهېدو د یوې اوونۍ په تېرېدو سره، افغانستان انټرنشنل دا خبر له ایرانیو رسنیو اخیستی او یو خبر یې خپور کړی، پرته له دې چې دا خبر په افغانستان کې له سرچینو سره شریک کړي.
دغې شبکې په یوه بل راپور کې په دې اړه ناسمې او ګمراه‌کوونکو کلیمې کارولې دي.
ریښتیا ارزول
تېره اوونۍ د طالبانو ویاند چلوصاف ته تایید کړه چې د ایران په لور د هلمند سیند اوبه روانې شوې دي.
طالبانو له ایران سره ژمنه کړې چې د افغانستان او ایران ترمنځ د اوبو تړون ته ژمن دي او د همدې تړون پر بنسټ به د ایران حق‌آبه ورسېږي.
د اوبو په تړون کې چې د دوو لومړيو وزیرانو (موسی شفیق او امیرعباس هویدا) ترمنځ لاسلیک شوې، د ایران د اوبو حق روښانه شوی دی.
د هغو ارزونو له مخې چې د دغو اوبو په هکله شوې، په مارچ، اپریل او مې (کب، حمل او غويي) میاشتو کې په دغه سیند کې ډېرې اوبه موجودې وي، خو په نورو وختونو کې ددغو میاشتو په پرتله د اوبو کچه کمېږي.
تېره اوونۍ ایران ته د اوبو د رسېدو لامل، په سیند کې د اوبو کچې زیاتوالی دی او طالبانو د ایران د اوبو حق ورلېږلی دی.
دغې شبکې په یوه بل راپور کې ادعا کړې چې د افغانستان او ایران ترمنځ د اوبو تړون هېر شوی، دا ادعا ناسمه ده، آن طالبانو ویلي چې د همدې تړون پربنسټ د ایران حق‌آبه ورکوي.
ددغه راپور په بله برخه کې راغلي «د دواړو هېوادونو ترمنځ چې سره ګډه پوله لري د حکومتونو ګټه‌غوښتنه د اختلافاتو د رامنځته کېدو لامل شوې ده.»
افغانستان له دغه تړون وروسته کلونو کې نه یوازې ایران ته د اوبو له تلو مخنیوی نه دی کړی، بلکې ددې برخې د څېړونکو د موندنو له مخې، ایران څو برابره اوبه ترلاسه کړې او هغه یې په بېلابېلو برخو کې لګولې دي.