افغانستان انټرنشنل شبکې چهارشنبې د غويي پر ۱۲مه د «رواداري د بشري حقونو بنسټ» له قوله لیکلي چې طالبانو د ایران چاپ کتابونو پېر پلور منع اعلان کړی دی.
دا راپور ناسم او ګمراه‌کوونکی دی.
دغه راپور له يو شمېر کتاب پلورونکو سره د خبرو پر بنسټ برابر شوی او په یوه برخه کې یې راغلي چې «د ایران چاپ کتابونه، د شیعه وګړو اړوند کتابونه، د تاجکانو، هزاره‌وو او ازبکو په شان بېلابېلو قومونو په اړه آثار منع شوي دي.»
ريښتیا ارزول
په دغه راپور کې، رواداري بنسټ د کابل د یوه کتاب پلورونکي له قوله لیکلي چې طالبانو کتاب پلورونکو او ناشرانو ته د سل عنوانه کتابونو نوملړ ورکړی ترڅو یې د پېر پلور مخه ونیول شي؛ خو په دې راپور کې د هېڅ کتاب نوم نه دی یاد شوی.
د چلوصاف معلومات ښيي چې طالبانو د ځینو کتابونو پلور د مخنیوي لپاره ـ چې ډېری په مخکیني طالبانو ضد حکومت کې لیکل شوي ـ کتاب پلورنځي پلټلي او یو شمېر دا کتابونه یې راټول کړي دي؛ خو د افغانستان کتاب پلورنځي د ایران چاپ کتابونو، د شیعه وګړو اړوند کتابونو او آن د بېلابېلو دیني مسایلو اړوند کتابونو څخه ډک دي.
طالبان تاییدوي، د هغو کتابونو د پېر پلور مخالف دي چې پکې «قومي تعصب» ته لمن وهل کېږي؛ خو د نورو کتابونو د پېر پلور په وړاندې کوم خنډ نشته.